Basel, im Joor des Herrn 1975:

Kalt isches gsi, der Wind het der Rääge unermiedlig duur d Gasse vo der Basler Innerstadt paitschd, d Stroosseladäärne hän geege d Dunggelhait aakämpft aber nit meh als e mieds Liecht uffen Asphalt gworfe. Ainsam und unhaimlig isches sälbetsmool gsi. Der Näbel isch in de Gasse blyybe stoh und het das mulmige Gfyyhl wemme duur d Gasse gloffen isch numme no verstärggd. Der Huet isch dief ins Gsicht zooge worde und der Rääge het, wenner vom Boode uffgspritzt isch, d Schueh und d Hoose vo unde här nass gmacht. S' isch sälbetsmool nit vyyl los gsi in de Basler Gasse.In däre unfrindlige Umgäbig sin 3 Persoone unerschrogge richtig Rest. Mäggd gloffe um bimmene hailige Glaas Bier Ihri Absicht z unterstryche, d Basler Drummelwält ney uffzmische.

Im Novämber 1975 isch im obe erwähnte Restorant d Dammbuuregrubbe GWÄÄGI grindet worde, e uss Basler Sicht histoorische Dag. Am Fasnachts Zischdig will me mitenander dur d Gasse ruesse und alles was bishär bikannt gsi isch an d Wand stelle ( Y ka my no dra erinnere ass d Ueli pausiert hänn) Aber isch das wichtig was d Ueli gmacht hänn? Nai.....

Und so isches denn ko dass am Fasnachts Zischdig im Joor 1976 d Gwäägi s erschd Mol duur d Basler Gasse gruesst sin. Sälbetsmol hesch ebbe no am Zischdig kenne dur d Innerstadt gässle, isch doch d Fasnacht am Zischdig noonig in däm Ussmass wie hyt abgloffe. Und was no vyyl wichtiger isch, s het no Baize gäh in dääre Stadt und nit numme Döner Ständ und Tscheesburger-Fräss-Tämbbel.

Aber zrugg zem Wäsentlige. Der Rolf Laufer, Walti Oppliger und der Mario Wohlfahrt sin die drey gschichtsdrächtige Dammbuure gsi wo der fasnachts Zischdig uff e Kopf gstellt hän. Drey Dammbuure als Gwäägi. So sin sy gloffe und das isch der Aafang gsi vonnere unglaublige Erfolgsgschicht vo deene gfäderete Veegel wo bishäär unerraicht isch.

Aigentlig wär das doch e richtig scheeni Grindigsgschicht, oder? Das duet der Wohret aber so nit wirgglig entspräche. Dorum folgend d Gschicht wie sich die Grindig wirgglig zuedrait het.

Im voorige Joorhundert hän die Aagfrässene am Fasnachts Zischdig gschlosse der ganz Dag zämme Fasnacht gmacht. Wie das innere Stammgsellschaft halt ab und zue isch hetts au derte verschiedeni Uffassige gäh wie me jetzt sott zämme der Dag verbringe. Die gross Mehrhait het welle e weeneli Drummle, längeri Pause mache und der Dag so ummebringe. E glaini Minderhait het welle drummlend Gas gäh in de Gasse.  Und eso isches denn ko, dass e glaini Minderhait uffbrochen isch um sich nimm, wie die andere, in de Pause der Grind mit Bier, Wyy und Gintonic voll z dröhne, sonder ruessend d Gasse uffzmische.

Die woogemuetige Drummler sin der Rolf Laufer, Mario Wohlfahrt und der Walti Oppliger gsi. Das isch so bassiert im Joor nyynzähhundertainesiebzig. Zwischendryy het sich der Luc Bourchvoi deene drey Drummler aagschlosse. Im Joor 1974 isch der Peter Bauer als Vordrääbler zue Ihne gstosse. Aber immer no sin die jetz fimpf Naase in de grosse Pause vo de Aagfrässene zämme uff d Gass.

Im Joor des Herrn 1975 sin die fimpf Grinder s erschd Mol mittemene gfäädrete Gossdym ummegloffe. Und was ganz wichtig isch, nit numme in de grosse Pause, nai der ganzi Fasnachts Zischdig. Als Gossdym het e Yberklaid dient, an das me Buzzfääde gnait het, so quasi als frisch gschlipfdi Veegeli isch me sälbetsmol ummegloffe. D Larve isch allerdings die glychi gsi wie die vo hytte, allerdings mittemene Filzhuet oobedruff.

Ai Joor speeter sin immer no die glyyche fimpf im hyttige Gwäägi Gossdym und mit der hyttige Larve duur d Basler Gasse gruesst, d Gwäägi sin offiziell geboore gsi. Das Datum isch Gschicht, will usser den Ueli niemmerts eso lang als raini Drummelgrubbe dur Basels Gasse ruesse duet.

In de folgende Joor het sich s Gsicht vo de Gwäägi immer meh gwandlet. Immer meh gueti Drummler sin zue Ihne gstosse und hänn welle uff dääre Erfolgswälle mitmache............. Willsch meh wisse???.... No muesch dy no e weeneli Gedulde, so goht gly wyter........