Gwäägi; E grossartige Namme fir e grossi Drummelgrubbe:

Domools im Joor 1976, sin fimpf Veegel als Gwäägi ummegloffe, das isch der Beginn gsi vonnere unglaublige Gschicht um e gueti Basler Zischdigsdrummelgrubbe. Mittlerwyyle sin yber 30 Joor ins Land gange und d Gschicht vo de Gwäägi isch in de vergangene Joorzähnt sehr beweggd gsi.

Nodämm die fimpf Grinder 1976 elai an der Fasnacht gsi sin, het sich das e weeneli in de Agfrässene ummegsproche und es hänn sich pletzlig no anderi fir d Gwäägi aafo interessiere. Me het aber au scho dozuemools nit aifach Greeti und Pleeti uffgno, sondern nooneme restriggdive Verfaahre ussgwählt. In der Blietezytt vo friehner hetts sogar e zahlemässigi Beschränggig by de Drummler gä. Nit e jeede wo het welle isch denn au tatsächlig yyhneko.

So im Verlauf vo de vergangene achziger Joor sin den die erschde Veegel derzuegstosse wo nit vo de Aagfrässene ko sin.  

Kurz nodäm s nynte Joorzähnt im letschde Joorhundert aabrochen isch, het sich e wytteri Spaltig aakyndet. E Dail vo de Gwäägi het sich welle im Saugladdismus e Namme mache und der anderi Dail het meh drummlerischi Aggzänt welle setze. Do sich baidi Parteie nit hän kenne duuresetze isches denn so ko wies halt ebbe schynts het miesse ko. Me het sich frindschaftdlig vonenander trennt und isch syni aigene Wäg gange.

Uss dääre Spaltig uuse het sich ybrigens e mittlerwyyle au nit grad unbekannts Gribbli bildet wo immer no Joor fir Joor mit neye Süschés und musikaalische Aigekompositioone d Fasnachtswält in Stuune duet versetze.

Duur das dass do e baar Seele d Gwäägi verloh hän, hets naddyrlig wieder Blatz gäh fir neyi feyni Veegel. Säggs sins an der Zahl gsi wo do gschlosse vo der BMG ko sin. Fir alli wo das gnau wänn wisse, s isch im Joor nynzähhunderdzwaienynzig gsi.

Der erschdi gmainsaami Heehepunggd isch den der Uffdritt vo de Gwäägi am Charivaari 1993 gsi. E unvergässlige Boléro wo mir do in Saal gschmättered hän und wo no lang noocheghallt het.

Es sin denn e baar Joor vo der Konsolidierig yydrädde, obwohl immer no der Aint oder Ander gange oder ko isch.

E wyttere Heehepunggd isch s Feschd gsy wommer uff d Bai gstellt hän wo d Gwäägi e viertel Joorhundert alt worde sin. Erschdens emoll der grossi Umgang mit ebbe 180 Drummler vom Räbhuus in Adler und wieder zrugg, zem zwaite s Gaartefeschd im St. Jakobs Gaartebaad wo mir alli ehemoolige Gwäägi yyglaade hän. Laider sin nit alli ko aber die wo dert derby gsi sin hän noonemoll der Gaischd vo de Gwäägi derfe spyyre.

Derno hän e baar vo uns Veegel im wääsendlige derzue bydrait dass s Ridicule, die wunderbaari fyyni Vorfasnachtsveraastaltig im Badische Bahnhoof, e guete und glungene Start het derfe verzaichne. Fir die wo derte spontaan zuegsait hän isch das au e tolls und scheens Erlääbnis gsi.

Derno hän ys wieder e baar verloo, dyssmool in Richtig vo de Ueli. S Gwäägi-Asyl isch grindet worde und mir Gwäägi luege peniibel druff dass es unserne Asylante dert by den Ueli guet go duet.

Jo und scho hets no wyttere fimpf Joor e Feschdli gäh, jetzt aber in glainem Rahme an der Fasnacht 06, wo dä bunti Huffe, bestehend uss Veegel vo de Aagfrässene, BMG, 1884, Gundeli und CCB, aagangen isch.

30 Joor Gwäägi, e scheeni Zahl, mir derfe doodruff au Stolz sy. Der Gaischd wo unseri fimpf Grinder ka hänn läbbd immer no in uns. 

Mir frayen uns uff die näggschde Joorzähnt, und uff das wo mir derfe Erlääbe als Gwäägi.